حسن أكل التفاح .. ثورة ١٤ أكتوبر كلاكيت للمرة ٥٦..!!


الاثنين 14 أكتوبر 2019 04:27 مساءً

بلال غلام حسين

=================

حسن يتسمع مسجلة بصوت عالي: العطروش يغني برع يأستعمار برع من أرض الأحرار برع ..

أبو حسن يدخل عليه الغرفة: مالك يأبني كذه تتسمع بصوت عالي المسجلة أيش أتخروعت..؟!!

حسن: يابا أنت أيش فهمك بدع النضال بدع, وأجا وقت الأعداء بانخرج أبتهم الإنجليز من بلادنا وبا نحررها..

أبو حسن: أيش من إنجليز يأهبل اللي باتخرجوهم باتموتوا جوع قالك بانخرج الإنجليز..!!

حسن: يابا أنت أيش فهمك قد نحنا مخططين كيف با نخرج المستعمر البغيض، وباتجي على كلامي وأول مانخرجهم بايجي الخير كله، وبانأكل التفاح والعنب من الطاقة..

أبو حسن: كيف من الطاقة يعني..؟!!

يرد حسن, يابا باتكون ممدد كذه بس ما عليك إلا تمد يدك لاعند الطاقة حق البرنده وتقطف العنب والتفاح وتأكله..

أبو حسن: هاااا والله خبر معانا اليوم, هيا أسمع خليك الجنان والخروعة حقك وأهجع، لعد تقتلب لي زاجي قالك باتأكلوا التفاح من الطاقة, طفي المسجلة مالك وماله ذي الخُباره..

حسن: خلاص يابا كل شي مرتب وبا نقلعهم من بلادنا الحُرة وباتشوف .. المناضلين حقنا با يحرروا البلاد والجبهة القومية هي القائد والموجه لنا.

أبو حسن: هيا أمي، سكه لك من ذي الهدرة يأبني أنا أفدالك، با ترجعوا تقولوا ياريت اللي جرى ما كان. .

حسن يقلب الكاسيت وبصوت عالي يتسمع للمرشدي: أنا الشعب زلزلة عاتية .. أنا الشعب .. يخلص الكاسيت يطلع حق العطروش، برع. ياستعمار برع من أرض الأحرار برع.. وهات يا قلعاب أغاني ثورية.

أبو حسن: إييييه هيا غلقت, قد نحنا رجعنا زلزلة عاتية..!! هيا زمطي لك زمطي، شكله باقي لك قليل وبا تتخروع، يأبني نقص المسجلة قليل صورتنا شوفك، مو معانا مقهاية كشر نقص الصوت بلا بعولة حقك..

حسن: خلاص يابا باسيبلك البيت وباروح عند الجماعة أصحابنا معانا إجتماع مهم نخطط لتحرير البلاد من براتن الإنجليز ..

أبو حسن: هيا مليح، هاا إذا لاقيتوا عافية من بعد ذي الهدرة، حرري لك حرري، والله مابا يوذي نحنا بداهية الا القنفزة الكذابة والزنط حقكم.

التاريخ: 30 نوفمبر 1967م: خروج الإنجليز من عدن وبدء الإحتفالات في شوارع عدن والناس تحتفل في الشوارع وحسن يرجع البيت فرحان ويصيح لأبوه: يابا يابا يابا ..

أبو حسن: مالك أيش في، صورتنا أنت وصياحك جبتلي السمرقع جني شلك..

حسن: يابا شفت كيف. مش قلت لك با نتحرر وبانخرج الإنجليز من بلادنا بعدما فجرنا الثورة الحمدلله الحمدلله .. خلاص يابا أجا الوقت الأن علشان نرتاح وبانأكل التفاح من الطاقة زيما قلتلك ياسلام يا ربون يابا أفرح وقشنن حررنا بلادنا الآن با يجي الخير كله..

أبو حسن يتفرج على وجه أبنه بإستغراب؟!! دحين أسمع يا هُبيله أنت، أيش من خير بلا دوخة حقك، البلاد ولا فيبه عانه والمغل فاضي والإنجليز سابوكم مفلسين وأنت مفرح لي بالاستقلال حقك..

حسن: يابا معليش با نبني البلاد من الصفر من أول وجديد ورجال الثورة بايصونوها وبا نطرد الاقطاع والرجعيين وعملاء الإستعمار والإمبريالية، أصبر أنت بس ولايهمك.

أبو حسن: أيش من إمبريالية الله يسامحك يا إبني هههههههه..

مرت بضعة أشهر من يوم خروج الإنجليز من عدن، وبدأ الإقتتال بين الرفاق وأتقارحت رؤوسهم، والفريق المنتصر يدرج المعارضين له بالسجن بالإضافة إلى الأبن حسن المناضل التقدمي.

أبو حسن يزور أبنه في السجن حاملاً كيس به تفاح: ياعسكري أجيت أزور أبني حسن ومعي كيس أشتي أهبله..!!

العسكري: هات الكيس ياحاج أنا با دخله لابنك.

أبو حسن: لا لا يأبني خليه يجيلي يشل الكيس من الطاقة لأنه قال لي بعدما يخرجوا الإنجليز بانأكل التفاح من الطاقة وأنا أشتيه يجي يأكله من الطاقة الأن زيما هو كان يتمنى.

حسن: سامحنا يابا أننا ماسمعت كلامك ومشيت اللي برأسي, هبلي بالشبل مرة ثانية لو عادنا أفتح حلقي وأتقفز ..

يرد عليه أبو حسن: يأبني قدنا قلتلك بطل القنفزه حقك والهدرة الفاضية وأنت عفلك مش راضي تسمع الكلام، سكيت عليا أنا الشعب زلزلة عاتيه وبرع يإستعمار .. هيا دحين كل التفاح من الطاقة حق السجن يا مليح ... شوف كيف أنكبعنا كبعة بوري.

http://www.adengd.net/news/415571/
جميع الحقوق محفوظة عدن الغد © {year}